مسلم لیگ (ن) میں شمولیت کا سلسلہ جاری، ڈیرہ غازیخان ڈویژن کی اہم شخصیات بھی شامل

 

لاہور ( اردو ورلڈ مانیٹرنگ ڈیسک ) پاکستان مسلم لیگ ن میں شمولیت کا سلسلہ جاری، سرکردہ سیاسی شخصیات اور سابق ارکان اسمبلی مسلم لیگ (ن) میں شامل ہو گئے۔ شمولیت اختیار کرنے والوں میں ڈیرہ غازیخان ڈویژن کی اہم شخصیات بھی شامل ہیں

 

تفصیل کے مطابق پاکستان مسلم لیگ ن میں اہم سیاسی شخصیات کی شمولیت کا سلسلہ جاری ہے۔  سابق وزیراعظم اور پاکستان مسلم لیگ (ن) کے صدر میاں شہباز شریف سے ملاقات میں سابق ارکان اسمبلی اور سیاسی شخصیات نے شمولیت کا اعلان کیا۔  جھنگ سے مولانا ایم آصف معاویہ، بابر خان سیال، مسز نیلم سیال، مہر اسلم بھروانہ، شیخ ایم یونس، خالد محمود سرگانہ، چوہدری خالد غنی، امیر عباس سیال، فیصل حیات جبوانہ، شیخ یعقوب، مسز شیخ یعقوب، رئیس محمد ابراہیم بھی مسلم لیگ (ن) میں شامل ہوگئے۔

 

ڈیرہ غازیخان ڈویژن کے ضلع راجن پور سے مزاری قبیلے کی سرکردہ سیاسی شخصیت سردار ریاض خان مزاری اور سابق سپیکر پنجاب اسمبلی سردار دوست محمد خان مزاری نے بھی مسلم لیگ(ن) میں شامل ہونے کا اعلان کر دیا ہے۔

 

میاں شہباز شریف صدر مسلم لیگ ن  نے پارٹی  میں شامل ہونے والوں کا خیر مقدم کیا اور مبارک دی۔ اس موقع پر گفتگو کرتے ہوئے میاں شہباز شریف نے کہا کہ مسلم لیگ (ن) ایک گھر ہے جو پاکستان کی ترقی اور خوشحالی کی ضمانت ہے، آپ کی شمولیت سے پاکستان کی ترقی کا سفر تیز ہوگا۔ مہنگائی سے عوام کو نجات دلانے کے لئے نواز شریف کے ہاتھ مضبوط کرنے ہیں۔ پاکستان کو معاشی طور پر پیروں پر کھڑا کرنے کی جدوجہد سب مل کر کریں گے۔ پاکستان کو درپیش بحرانوں کا مقابلہ اتحاد، اتفاق اور سیاسی تعاون کی قوت سے کریں گے۔

 

سابق ارکان اسمبلی نے پارٹی قائد محمد نواز شریف اور صدر شہباز شریف پر اپنے مکمل اعتماد کا اظہار کیا۔  سابق ارکان اسمبلی نے اظہا ر خیال  کرتے ہوئے کہا کہ قائد محمد نواز شریف اور شہباز شریف نے پاکستان کی ترقی، خوشحالی اور عوام کے ریلیف کے لئے ہمیشہ دیانتداری اور خلوص سے کام کیا۔ وہ ان کی قیادت پر مکمل یقین اور بھروسہ کرتے ہیں۔

 

اس موقع پر پاکستان مسلم لیگ (ن) پنجاب کے صدر رانا ثناءاللہ، جنرل سیکرٹری پنجاب سردار اویس خان لغاری اور سردار ایاز صادق و دیگر رہنما  بھی اس موقع پر موجود تھے۔

 

یہ بھی پڑھیں:

یہ عبرت کی جا ہے تماشہ نہیں ہے

پی ٹی آئی  کے انٹرا پارٹی الیکشن چیلنج، بلا چھن جانے کا خدشہ بڑھ گیا